Aктерot Џонатан Мејџорс бил уапсен во Њујорк во текот на викендот под обвинение за напад и вознемирување, што доведе до тоа американската армија да ја повлече новата реклама со ѕвездата на „Крид 3“ (Creed III).
Мејџорс, кој неодамна додели награда на „Оскарите“ заедно со својот колега од „Крид 3“, Мајкл Б. Џордан, бил приведен во саботата наутро на Менхетен по домашна расправија, според полицијата и неговиот адвокат.
30-годишната жена се здобила со полесни повреди на главата и вратот и е пренесена во болница во стабилна состојба, соопшти њујоршката полиција. Мејџорс (33) се појавил пред истражен судија подоцна во саботата и бил ослободен без кауција.
Во кривичната пријава се наведува дека ја удрил жената по лицето, ѝ нанел расекотина зад увото, и потоа ја фатил за вратот, предизвикувајќи ѝ модрици.
