Претседателот Стево Пендаровски од денеска престојува во работна посета на Франција, по повод одбележувањето на 100-годишнината од раѓањето на македонскиот поет Ацо Шопов.
Претседателот Пендаровски утре во седиштето на УНЕСКО во Париз ќе се обрати на отворањето на меѓународниот симпозиум во чест на Ацо Шопов, настан во рамки на одбележувањето на „2023 – Година во чест на Ацо Шопов“, што се реализира под покровителство на македонскиот претседател. Исто така, претседателот Пендаровски ќе присуствува на поетски перформанс и изложба во чест на Шопов.
Предвидено е претседателот Пендаровски да се сретне со генералната директорка на УНЕСКО, Одре Азуле.
Пендаровски денеска во Париз ќе го посети Националниот институт за ориентални јазици и цивилизации – ИНАЛКО, каде ќе се сретне со директорот на институтот, Жан Франсоа-Хуше, како и со Фроса Пејоска-Бушеро, шеф на Катедрата за македонски студии при ИНАЛКО и со Ѓоко Здравески, лектор по македонски јазик на институтот.
Претседателот Стево Пендаровски е покровител на чествувањето на 100-годишнината од раѓањето на македонскиот поет Ацо Шопов, што се одбележува со низа настани во текот на 2023 година.
Чествувањето на големиот јубилеј е во соработка со Организацијата за образование, наука и култура на ОН – УНЕСКО, којашто на иницијатива на Македонија, го поддржа и се вклучи во одбележувањето на јубилејот.
