Резултатот од претседателските избори во САД во 2024 година може да влијае на ситуацијата во Украина, изјави денеска унгарскиот премиер Виктор Орбан.
Орбан за радио „Кошут“ посочи дека Украина може да продолжи со борбените операции се додека ја добива поддршката од САД, а кога таа поддршка ќе престане, ќе биде возможен прекин на огнот.
„Поранешниот американски претседател Доналд Трамп, кој планира повторно да се кандидира за претседател, сака крај на конфликтот во Украина“, рече Орбан, истакнувајќи дека резултатите од претседателските избори во САД следната година би можеле да влијаат на исходот на војната.
Унгарскиот премиер истакна дека САД одиграле помалку активна улога во обидите за обликување на европската политика во последните години, но дека ситуацијата се променила откако изби вооружениот конфликт во Украина и дека сега Вашингтон го презеде раководството, на она што тој го нарече „воена коалиција“ која го поддржува Киев.
Унгарската влада постојано нагласува дека ќе бидат потребни преговори за решавање на украинскиот конфликт, не само меѓу Украина и Русија, туку и меѓу Русија и САД, со оглед на улогата на Вашингтон како главен политички и воен сојузник на Киев, пренесе ТАСС.
