Артан Груби се изрезили себеси, а ја изрезили и Македонија, за надзор на изградбата на коридорите 8 и 10д првин избрал руска фирма, а сега кинеска, изјави пратеникот од ВМРО-ДПМНЕ, Бојан Стојаноски, на прес-конференција.
Опозициската партија наведе дека надзорот над американската „Бехтел“ во Македонија, поради Груби, ќе го врши кинеската „Ептиса“, која од 2016 година е во целосна сопственост на кинеската „ЈСТИ груп“, а од 2022 година целиот врвен менаџерски тим е составен од Кинези, па така Шаонин Жу е потпретседател на бродот на директори на „Ептиса“, Чао Ванг, финансиски шеф на „Ептиса“, и Јиран Меи, менаџер на „Ептиса“ – се раководниот кадар на спорната компанија за која Владата, иако велеше дека е криминална, ја избра за надзор на проект вреден речиси 2 милијарди евра.
„Груби велеше дека ова не е истата ‘Ептиса’, да, оваа ‘Ептиса’ од 2022, покрај тоа што е со целосно кинески капитал, а во целост водена од Кинези, бидејќи Кинез е главниот извршен директор. Не знаеме дали овие Кинези на Груби му личат на Шпанци, но знаеме дека го компромитира целиот проект и подобро е сега да се поништи постапката за надзорот и да се избере нов отколку подоцна сите да ги платиме последиците кои може да дојдат. Ова е единствен случај во светот каде што кинеска компанија ќе контролира американски гигант, за какви криминални врски станува збор со Владата на Груби и Ковачевски?
Груби и Ковачевски со изборот на ‘Ептиса’ одат во целост против ставот на американската администрација, искажан од државниот секретар Мајк Помпео при неговата посета во Охрид, кој гласи: Сакам да ве предупредам за учеството на Кина во чувствителни технологии и нивната стратегија за подмитување при обезбедување зделки“, рече Стојаноски.
Пратеникот наведе дека Груби и Ковачевски ѝ овозможиле на кинеската „Ептиса“ да има увид на технологиите на „Бехтел“.
Побара од Јавното обвинителство да отвори случај за изборот на надзорот и со големо внимание да ја земе предвид и изјавата на државниот секретар на САД, Помпео, кој предупредува на корупција.
