Алијанса за Албанците како што соопштуваат од таму „безрезервно ги поддржува условите кои јавно ги изнесе премиерот на Република Косово, Албин Курти, во рамките на дијалогот Косово-Србија со посредство на Европската Унија и поддржан од САД“.
Оценуваме, додаваат од партијата, дека здружувањето на општините со српско мнозинство не може да биде моноетничко и дека мора да биде во целосна согласност со правно-уставниот поредок на Република Косово и со одлуката на Уставниот суд од 23 декември 2015 година.
„Малцинствата во Република Косово уживаат загарантирани права според највисоките европски стандарди, со пософистицирани механизми за заштита од која било друга земја во регионот. Секое решение кое би се засновало на шовинистичките барања на Белград би создало опасен преседан за регионалната стабилност зголемувајќи ги апетитите на различните националистички кругови, во кревко време за Западен Балкан, кога целиот политички капитал на повеќето земји во регионот е фокусиран на исклучување од Русија и заживување на проширувањето на ЕУ“, се подвлекува во соопштението од оваа партија.
Бараме, додаваат од Алијанса за Албанците, зголемување на мобилизацијата од меѓународните партнери за постигнување правно обврзувачки договор, со взаемно признавање во центарот и според роковите од европскиот план за нормализација на односите меѓу Косово и Србија.
