Бисера Костадиновска уште еднаш покажува целосна отсутност и незаинтересираност за македонските обележја. Карневалот во Вевчани повторно остана, без поддршка од министерството за култура на Република Македонија, вели Ѓорги Влајнкиноски, претседател на ОК на ВМРО-ДПМНЕ Вевчани.
Според него, Вевчанскиот карневал е во постапка за да влезе на листата на културно нематеријално наследство. Оценува дека карневалот е препознатлив симбол за Вевчани и Македонија. А, Вевчанскиот карневал, како што вели, останува без помош од министерството и министерката Бисера Костадиновска Стојчевска.
„Никаков слух од страна на министерката и оваа криминална власт за да се помогне оваа традиционална манифестација по која е позната државава во светски рамки. До пред две години, Вевчанскиот карневал редовно беше дел од годишната програма на министерството за култура, секоја година беа покровители на овој меѓународен карневал. И покрај опструкциите од СДС-ДУИ и од Костадиновска и оваа година Вевчански карневал ќе има и тој ќе се одржи“, потенцира тој.
Вевчанци, како што вели, нема да дозволат оваа манифестација да не се одржи, нема да дозволат згаснување на традицијата, згаснување на културата и бришење на македонското нематеријално наследство. Дополни дека локалната власт предводена од градоначалникот Спасе Кочовски, како и покровители и љубители на карневалот, со сите свои напори ќе ја организираат оваа светска манифестација.
Ги повика граѓаните од 12-ти до 14-ти јануари да дојдат во Вевчани, да го посетат карневалот, со што, како што рече, директно ќе се покаже пркос кон антимакедонските политики на СДС/ДУИ.
