Новак Ѓоковиќ најверојатно повторно ќе ги пропушти Мастерс 1000 турнирите во Индијан Велс и Мајами ако остане на ставот да не се вакцинира против КОВИД, откако американските власти потврдија дека сите кои не се американски државјани нема да бидат пуштени без вакцина.
Според Администрацијата за безбедност при транспортот, сите странци кои ќе влезат во САД мораат да бидат вакцинирани, а мерките ќе бидат на сила барем до 10 април. Индијан Велс се оддржува од 6 до 19 март, додека Мајами опен од 20 март до 2 април. Ѓоковиќ поради својата одлука не настапи на САД опен минатата година.
35-годишниот деветкратен шампион од Австралија опен лани не ја бранеше титулата ниту во Мелбурн, откако беше депортиран пред стартот на првиот гренд слем во 2022. Тој овојпат се наоѓа во Австралија, откако властите решија да му ја укинат тригодишната забрана за влез во земјата и игра на турнирот во Аделаида.
