Новата влада на Израел, на чело со премиерот Бенјамин Нетанјаху, помалку јавно ќе зборува за ситуацијата во Украина, изјави израелскиот министер за надворешни работи Ели Коен.
– Во однос на односите меѓу Русија и Украина, ние дефинитивно ќе направиме една работа – помалку јавно ќе зборуваме за тоа – рекол Коен, а пренесува израелскиот весник „Хаарец“.
Министерот, сепак, не сакаше да го коментира барањето на Киев за испорака на оружје, но нагласи дека Израел ќе продолжи да и дава хуманитарна помош на Украина.
Коен најави и дека има намера да разговара со неговиот руски колега Сергеј Лавров. Според „Тајмс оф Израел“, министрите би можеле да разговараат на 3 јануари.
Новата влада на Израел, предводена од лидерот на партијата Ликуд, Бенјамин Нетанјаху, положи заклетва на 29 декември.
Нетанјаху претходно беше премиер на земјата – од 1996 до 1999 година и од 2009 до 2021 година.
