Менаџерот на Манчестер Јунајтед, Ерик тен Хаг, ја избрал португалската ѕвезда Гонсало Рамош како опција број еден за засилување на нападот на тимот во зимскиот преоден рок и ја соопштил својата одлука на управата на „црвените ѓаволи“.
21-годишниот играч одигра споредна улога за Бенфика минатата сезона кога Дарвин Нуњез го предводеше нападот на португалскиот тим, но Рамош се разви во клучен играч и во својот клуб, а покажа дека може да биде одлична замена и за Кристијан Роналдо во репрезентацијатра. Токму тоа му е потребно и на Манчестер Јунајтед.
Напаѓачот се најде на насловните страници за време на Светското првенство бидејќи постигна хет-трик за Португалците во победата од 6:1 над Швајцарија во осминафиналето.
Сепак, Гонсало Рамош нема да биде евтина аквизиција за Јунајтед, со оглед дека Бенфика веројатно нема да попушти да добие помалку од неговата ослободителна клаузула, која изнесува 120 милиони евра.
Жоао Феликс од Атлетико Мадрид, Мемфис Депај од Барселона и Рафаел Леао од Милан се другите имиња во потесниот избор на Тен Хаг.
