Претставници на курдската заедница во Франција протестираа во центарот на Париз поради убиството на тројца Курди во француската престолнина, нагласувајќи дека овој случај ја покажува ранливоста на нивната заедница.
Вооружен маж уби три лица во Курдскиот културен центар и блиското кафуле во петокот во прометниот 10-ти арондисман во Париз.
Полицијата уапси 69-годишен маж кој неодамна беше ослободен од притвор додека го чекаше судењето за напад со сабја во мигрантски камп во Париз пред една година.
Откако гневните толпи се судрија со полицијата во петокот попладне, Курдскиот демократски совет во Франција (ЦДК-Ф) повика на протест во сабота во 12 часот на Плоштадот на Републиката, традиционално место за протести во Париз.
Неколку стотици луѓе се собраа на плоштадот, многумина носеа знамиња. Париската обвинителка Лоре Бекуау во петокот рече дека можните расистички мотиви ќе бидат дел од истрагата, но курдските претставници порачаа дека случајот треба да се третира како терористички напад.
„Знаеме дека сме под закана, Курдите воопшто, курдските активисти и милитанти. Франција ни должи заштита“, изјави портпаролот на ЦДК-Ф, Бериван Фират, за ТВ БФМ.
