Украинските истражители открија „соба за мачење“ во неодамна ослободениот град Херсон, каде што руските сили наводно држеле и малтретирале деца, изјави украински официјален претставник.
Руските сили ги држеле децата во, како што ги нарекоа, „детски ќелии“ и им давале многу малку вода и речиси воопшто храна, изјави шефот на украинската канцеларија за човекови права, Дмитро Лубинец, повикувајќи се на сведоштва на жителите на Херсон.
Според овие сведоштва, децата биле подложени на психичка тортура. Според сведоците, руските војници им рекле дека родителите ги оставиле и дека никогаш нема да се вратат дома.
14-годишно момче било фатено и подоцна мачено само затоа што фотографирало уништена руска опрема, тврди Лубинец.
„За прв пат снимивме мачење на деца. Мислев дека нема ништо полошо по Буча и Ирпин, но дното навистина беше достигнато во Херсон“, додаде тој.
„Гардијан“ наведува дека овие тврдења не се независно проверени, а руската страна се уште не ги коментирала. Новинарите на „Гардијан“ претходно посетија друга „соба за мачење“ во Херсон. Украинската страна тврди дека таму биле приведени десетици мажи кои биле тепани, мачени со електрошокови од руски војници, а некои од нив биле убиени.
