Јужнокорејскиот претседател Џун Сук-Јол им се извини на граѓаните за трагичната несреќа за време на Ноќта на вештерките во Сеул, во која загинаа 156 лица и вети дека ќе ги повика на одговорност сите функционери кои се прогласени за виновни, пренесува „Ројтерс“.
„Жал ми е и им се извинувам на ужалените семејства погодени од оваа неописива трагедија и на луѓето кои ја споделуваат нивната болка и тага со нив“, рече Јол.
Додаде дека не се осмелува да се споредува со родителите кои изгубиле синови и ќерки, но дека „како претседател кој има должност да ги штити животите и безбедноста на луѓето, неговото срце е скршено“.
Полицијата се соочи со остри критики од јавноста за непрофесионалниот одговор пред и за време на трагедијата, бидејќи испрати само 137 полицајци во спорната област, и покрај претходните проценки дека ќе се соберат околу 100.000 луѓе.
Трагедијата се случила вечерта на 30 октомври за време на прославата на празникот Ноќта на вештерките, кога се случи стампедото.
