„Србија ги тера и ги охрабрува косовските Срби да ги напуштат своите работни места во косовските институции“, напиша на Твитер Блерим Вела, шефот на кабинетот на косовската претседателка Вјоса Османи, реагирајќи на одлуката на Србите да ги напуштат сите институции во Приштина и да поднесат оставки. Тој додаде дека тоа го потсетува на руското поттикнување во Донбас во 2014 година.
„Тоа покажува и дека режимот на Александар Вучиќ ја користи Српската листа за дестабилизација“, напиша Вела.
🚨With coercion of Kosovo Serbs to leave 🇽🇰 institutions, #Serbia unilaterally violated all Brussels agreements on disbandment of its illegal structures in #Kosovo.
Such intimidation will not work! 🇽🇰 institutions will remain multiethnic and representative of all communities.
— Blerim Vela (@Blerim_Vela) November 5, 2022
Тој додаде дека Белград еднострано ги прекршил сите бриселски договори за распуштање на неговите структури на Косово, принудувајќи ги косовските Срби да ги напуштат косовските институции.
„Ваквото заплашување нема да успее! Косовските институции ќе останат мултиетнички и репрезентативни за сите заедници“, напиша Вела.
Претставниците на Србите од Косово по средбата во Звечан донесоа одлука Србите да се повлечат од сите приштински институции – собранието, владата, локалните самоуправи, судството, обвинителството и полицијата. Полициските команданти од северот на Косово јавно ги соблекоа униформите со порака „доста е“.
