Министерката за труд и социјална политика, Јованка Тренчевска, денеска ги прими на средба претставниците на здруженијата на лица со оштетен вид, кои беа дел од протестот пред Владата на Република Северна Македонија.
Претставниците беа со барања до министерката за повеќе средства за помагала, како и зголемување на висината на додатокот за слепило што го добиваат.
Тренчевска истакна дека за да може да се обезбедат секаков вид помагала, најпрвин потребно е да се определи бројката на лица што имаат потреба од нив, како и за која категорија лица се работи.
„Најпрвин треба да се фокусираме на најнеопходните помагала, а потоа ќе ги вклучиме и другите. Мораме да ги мапираме вашите потреби и приоритети“, рече Тренчевска.
Министерката им даде временски рок за доставување на потребните информации, кои вклучуваат број, како и структура на лица, за да може да се определат потребните помагала.
Во однос на покачувањето на додатокот за слепило и неговото врзување со просечната плата, министерката истакна дека секоја држава има своја даночна политика и законодавство, кое треба да се почитува. Таа додаде дека во согласност со
Законот за социјалната заштита сѐ што не е врзано со плаќањето на придонеси се врзува со трошоците за живот.
„За решавањето на ваквите предизвици, треба да преговараме. Во моментот целиот свет и ние се соочуваме со најголемата економска криза. Владата ги вложува сите напори за нејзино надминување преку субвенционирање од 80 % на сметките за струја, со што директно влијаеме на домашниот буџет на сите домаќинства во државата. Го донесовме новиот пакет-антикризни мерки, каде што лицата со попреченост добиваат 4 месеци по 3.000 денари и доколку има потреба, ќе размислуваме и за нов пакет-мерки во наредниот период“, изјави Тренчевска
На крајот од средбата учесниците се договорија по доставувањето на информациите од страна на здруженијатфа, да се одржи уште една средба со сите релевантни фактори, каде што ќе се решава за понатамошно постапување.
