Претседателот на Украина, Володомир Зеленски награди неколку лица со Орденот на кнезот „Јарослав Мудриот“, а меѓу нив е и претседателот на македонското собрание, Талат Џафери.
Се наведува дека орденот се доделува за значајни лични заслуги во зајакнувањето на меѓудржавната соработка, поддршката на државниот суверенитет и територијалниот интегритет на Украина, како и значителен придонес во популаризацијата на украинската држава во светот.
Указот е објавен на официјалната веб страна на украинското претседателство, каде што може да се види целиот список со лицата на кои Зеленски им додели орден.
Џафери во април годинава ја посети Украина, пришто порача дека неговото присуство е симбол на лична, институционална и поддршка од граѓаните на Република Северна Македонија кон народот на Украина и украинските институции.
