Австралискиот премиер Ентони Албанезе ги посети поплавените делови на австралиската држава Викторија, вклучувајќи го и градот Мелбурн.
Локалните власти соопштија дека првата жртва од поплавите била пронајдена во саботата, бидејќи телото на маж било пронајдено во водите во близина на градот Рочестер, 200 километри северно од Мелбурн.
Делови од државите Викторија, Нов Јужен Велс и Тасманија беа под предупредување за поплави, откако минатата недела наврна повеќе дожд во југозападниот дел на земјата од просекот за целиот месец, објави Ројтерс.
Државите во источна Австралија веќе беа погодени од сериозни поплави на почетокот на 2022 година, бидејќи земјата е под влијание на временскиот феномен Ла Ниња, кој донесе обилни дождови.
„Австралијците се обединети, меѓусебно си помагаат и уште еднаш, во најлошите моменти го гледаме најдоброто од австралискиот карактер“, рече Албанезе во Мелбурн.
Премиерот рече дека „многу сериозен метеоролошки настан“ ги погодил урбаните и регионалните општини и дека 60 австралиски војници помагаат во евакуацијата и ставаат вреќи со песок.
Тој објави дека државата ќе плати 1.000 австралиски долари (620 американски долари) на секој кој е сериозно повреден или чиј дом е оштетен или уништен.
Во Викторија, каде што беше најлошото од поплавите, фокусот остана на северот, особено во градот Шепартон, каде на неколку илјади жители им беше кажано дека е предоцна за евакуација бидејќи нивото на водата се зголеми.
Видеата на социјалните мрежи покажаа дека жителите на Шепартон се движат по поплавените улици со чамци, а голем дел од градот е под вода.
Во Мелбурн, илјадници жители ја чистеа калта откако во петокот се излеа реката поплавувајќи ги предградијата во близина на централната деловна област.
Во Нов Јужен Велс денеска важеше предупредување на 74 места, додека во Тасманија беше издадено предупредување за 22 локации.
