Здравствените системи во Сирија и Либан би можеле да пропаднат под притисокот на епидемијата на колера која се шири во регионот на Блискиот Исток.
Во последните недели Обединетите нации регистрираа повеќе од 13.000 сомнителни случаи во Сирија и тоа е прва епидемија на колера во таа земја по повеќе од десет години, пишува „Индепендент“.
Во Сирија колерата веќе однесе 60 животи, објави Светската здравствена организација, но се стравува дека бројот на жртви ќе биде поголем поради ограничените капацитети за тестирање. Се стравува дека ризикот од заразување со колера, која се шири преку контаминирана храна или вода, им се заканува на милиони луѓе во регионот. Ако болеста не се лекува, може да биде фатална.
Колера досега е откриена во 13 од 14 сириски провинции, а во последните недели се прошири и пред границата, во соседен Либан, каде се потврдени 14 случаи, а се сомничат уште десетици.
Хуманитарните организации предупредуваат дека болеста може да се прошири во регионот на Блискиот Исток, а здравствените системи во Сирија и Либан се пред колапс поради акутната економска криза и конфликт.
Во Либан, кој ја доживува една од најтешките економски кризи, има чести прекини на струја, недостиг на вода и недостиг на лекови. Се проценува дека три четвртини од населението во Либан живеат под прагот на сиромаштија.
Либанските здравствени власти потврдија десетина случаи на колера, што е прв случај на колера во земјата по 30 години. Првиот случај е регистриран во заедницата на сириски бегалци во Либан.
Во исто време, околу 700 деца со симптоми на дијареа се хоспитализирани во провинција на северот на Ирак, јавуваат ирачките медиуми, а се стравува дека причината би можела да биде колера, иако случаите сè уште не се потврдени.
