Некои руски официјални лица повикаа на одмазда за експлозијата што вчера сериозно го оштети мостот на Крим што ги поврзува Крим и Русија.
„ Против нас се води нескриена терористичка војна“, изјави за агенцијата РИА Новости пратеникот на руската владејачка партија Олег Морозов.
Агенција Франс прес ја цитираше изјавата на рускиот функционер Кирил Стремусов: „Сите чекаат одмазднички удар и тој веројатно ќе дојде“.
Се огласи и Владимир Рогов, проруски лидер во Запорожје, кој рече дека „терористичка Украина мора да биде уништена“.
Но сојузникот на Путин, Дмитриј Медведев, кој вообичаено зборува многу жестоко против Украина и Западот, сè уште не коментира ништо за мостот.
Мик Рајан, пензиониран австралиски генерал-мајор кој сега работи во Центарот за стратешки и меѓународни студии во Вашингтон, рече дека дури и ако Украинците не стојат зад експлозијата, таа претставува „голема победа за Украина во операцијата за демонстрација на удари“.
„ Тоа е демонстрација на Русите и на остатокот од светот дека руската армија не може да заштити ниту една провинција што неодамна ја анектираше“ вели тој.
