Украина планира да ја поддржи Германија во нејзините напори да ја прекине нејзината зависност од рускиот увоз на енергија и да и понуди на најголемата европска економија да ја снабдува со електрична енергија, според германските агенции.
„Украина моментално ја извезува својата електрична енергија во Молдавија, Романија, Словачка и Полска. Сосема сме подготвени да го прошириме нашиот извоз во Германија“, изјави украинскиот премиер Денис Шмихал за ДПА.
„Имаме доволно електрична енергија во Украина благодарение на нашите нуклеарни централи“, рече Шмихал, додавајќи дека тој ќе го покрене ова прашање за време на посетата на Германија овој викенд.
Шмихал денеска треба да пристигне во Берлин, а во недела треба да се сретне со канцеларот Олаф Шолц.
Во средината на март, Украина ја синхронизираше својата електрична мрежа со европската мрежа. Оттогаш, Киев извезува меѓу 400 и 700 мегавати електрична енергија дневно во Европската унија и Молдавија, пренесува агенцијата.
Според ДПА, Шмихал сега сака да ги зголеми извозните квоти за ЕУ. „Тоа би било многу добро за двете страни. ЕУ би добила повеќе енергија, а ние би добиле девизи, кои ни се многу потребни“, рекол украинскиот премиер.
