Обединетите Нации предупредија дека Северна Кореја во моментов се подготвува за својата прва нуклеарна проба од 2017 година.
Изминатите месеци се забележани градежни работи на подземен тест на северот од земјата, јавуваат светските агенции.
„Работата на полигонот за нуклеарно тестирање Пунгје-ри го отвора патот за дополнителни нуклеарни тестови за развој на нуклеарно оружје“, се вели во доверливиот извештај на ОН, чии делови биле достапни на ДПА.
Сателитските снимки на локацијата сугерираат дека Северна Кореја ја поправала својата тунелска мрежа во Пунгје-ри, како и обнова на објектите на локацијата што беа урнати во 2018 година за време на преговорите со Соединетите Американски Држави, пренесува агенцијата.
Според написите, со месеци, набљудувачите се загрижени дека по бројните ракетни тестови на Пјонгјанг, првата нуклеарна проба на Северна Кореја по речиси пет години би можела да биде неизбежна.
Меѓународната агенција за атомска енергија (МААЕ) ги истакнува активностите во Пунгје-ри од јуни, каде Северна Кореја извршила шест експлозии на нуклеарни проби во периодот од 2006 до 2017 година.
Владата во Пјонгјанг е под строги санкции поради нејзините програми за нуклеарно оружје и балистички ракети.