Врховниот суд на Русија денеска го прогласи украинскиот полк „Азов“ за терористичка група, јави дописникот на „Ројтерс“ од судницата.
Единицата за специјални операции „Азов“, која има екстремно десничарски и ултранационалистички корени, е една од најпознатите украински воени формации кои се борат против Русија во источна Украина.
Русија често го наведуваше примерот на „Азов“ во прилог на тврдењето дека Украина е контролирана од „фашисти“, а Москва милитантите од таа формација ги споредуваше со нацистите од Втората светска војна.
Многу членови на „Азов“ беа заробени по падот на Мариупол, по опсадата што траеше речиси три месеци.
Официјални лица на самопрогласената Народна Република Доњецк /ДНР/, кои го окупираа Мариупол, во мај објавија дека заробените милитанти на „Азов“ може да бидат осудени на смрт, според законите на ДНР.