Потенцијално смртоносен вид на бактерии, кој претходно беше забележан само во јужна Азија, Африка и Австралија, за прв пат е откриен во примероци од почва и вода собрани во САД, соопшти во средата американскиот Центар за контрола и превенција на болести (ЦДЦ).
Бактеријата наречена Burkholderia pseudomallei, пренесува NBC News, може да предизвика болест наречена мелиоидоза, за која е познато дека е фатална.
Во САД, околу десет случаи на мелиоидоза се евидентираат секоја година, обично кај луѓе кои претходно живееле во странство.
Но, во средата, ЦДЦ објави дека бактеријата била пронајдена во примероци од почвата и водата собрани долж брегот на заливот Мисисипи и издаде предупредување за здравјето на сите лекари во Америка да внимаваат на можни знаци на мелиоидоза, кои можат да бидат нејасни и вклучуваат кашлица, треска и болка во градите.