Тренерот на Баерн Минхен, Јулијан Нагелсман ги подгреа шпекулациите дека Хари Кејн би можел да премине во баварскиот гигант. Тој не ја негираше таквата можност на прашањето за капитенот на Англија, иако потенцираше дека тоа е многу скап и тешко достижен трансфер.
„Тој е многу скап, тоа е проблемот, но секако е фантастичен играч. Еден од ретките кој може да игра како центарфор и како број „10“. Многу е силен, брилијантен со глава и со двете нозе. Секако дека би постигнал многу во Бундеслигата. Не знам која е неговата цена, но за Баерн ќе биде тешко да го купи. Ќе видиме што ќе се случи во иднина“, изјави Нагелсман.
Кејн има договор со Тотенхем до 2024. Минатото лето сакаше да замине, но клубот не му дозволи да прејде во Манчестер Сити. По доаѓањето на Антонио Конте, напаѓачот се чини дека се чувствува многу поудобно бидејќи ја гледа можноста тимот да се бори за трофеи во блиска иднина.