Српскиот тренер Младен Крстајиќ и официјално беше претставен за нов селектор на фудбалската репрезентација на Бугарија.
Во соопштението на Бугарската фудбалска федерација (БФС) се наведува дека Крстајиќ потпишал двегодишен договор.
“Мислам дека ова е чекор во вистинската насока. Младен е претставник на традиционално силна фудбалска и тренерска школа. Млад е и амбициозен, но има солидно искуство. Сигурен сум дека со својот авторитет ќе придонесе за подобра иднина на бугарската репрезентација“, изјави претседателот на БФС, Борислав Михаилов.
На Крстајиќ ќе му помагаат Немања Миличиќ и Стефан Јанковиќ, а тренер на голманите ќе биде Дарко Божовиќ.
Крстајиќ (48) во својата кариера ги водеше Макаби Тел Авив, ТСЦ и српската репрезентација од 2017 до 2019 година.
Новиот бугарски селектор ќе дебитира на 23.септември против Гибралтар на домашен терен, а три дена подоцна Бугарија ќе гостува во Скопје.