Филмската потера се случи денеска пред самиот Ватикан. Италијанските карабинери биле принудени да пукаат во гумите на возило чиј возач одбил да запре откако ја пробил полициската ограда на улицата Павле VI, објави италијанскиот „Кориере дела сера“.
Наместо да застане, возачот на БМВ дал уште посилен гас па следела потера, а автомобилот конечно бил запрен од полициска блокада кога БМВ удрило во оклопно возило.
Полицијата потоа го опколила автомобилот, но возачот се забарикадирал, па морале да го скршат стаклото за да го извлечат, а откако ги нападнал, тие употребиле електричен пиштол за да го приведат.
Двајца полицајци се повредени и пренесени во болница, но не се во животна опасност.
Сето тоа се случило пред многу туристи кои се собираат во близина на плоштадот Свети Петар каде го чекаат традиционалното обраќање на папата Франциско.
Според информациите на италијанските медиуми, возач на автомобилот бил 39-годишен албански државјанин, а бил под дејство на дрога и по апсењето бил пренесен во полициска болница.