Претседателот на Владата Димитар Ковачевски заедно со вицепремиерот за економски прашања Фатмир Битиќи и министрите за транспорт и врски и за земјоделство, шумарство и водостопанство Благој Бочварски и Љупчо Николовски и градоначалникот на Пробиштип Драган Анастасов, денеска беа во увид на градежните работи на регионалниот пат Пробиштип- Лесново.
Станува збор за обновување на патната делница од Пробиштип до Лесново во должина од 3,4 километри.
Премиерот рече дека по направената подготовка за проширување и поставувањето инсталациите за одводнување, сега е во тек асфалтирањето до влезот на манастирот Лесново. Со оваа рехабилитација, вели Ковачевски, Лесновскиот манастир, познатите вулканските карпи, пештерите и другите природни убавини и реткости ќе станат подостапни за посетителите.
„Заедно со велосипедизмот и планинарењето, во овој крај има огромен потенцијал за развој на туризмот. Реконструкцијата на овој пат е од витално значење не само за Општина Пробиштип, туку и за развој на регионалниот туризам. Лесново привлекува голем број на туристи, а реконструкцијата значително ќе придонесе за подобри услови и дополнителен развој“, рече Ковачевски.
Како што додаде, од 2017 година досега изградени и обновени се над 1000 километри патишта. Инвестирано е повеќе од една милијарда евра во изградба и модернизација на патната мрежа во земјава.