Министерката за труд и социјална политика, Јованка Тренчевска денеска оствари средба со претседателот на СОНК, Јаким Неделков, на која присуствувале и претставници на синдикатот и Министерството за труд и социјална политика.
Како што информираат од ресорното министерство, на средбата се разговарало за барањата кои се дел од одлуката за штрајк на вработените во детските градинки, а за кои во изминатиот период не била отворена дискусија.
Исто така, се отворило и прашањето за платите на вработените за време на штрајк.
„На состанокот беше договорено дека дијалогот продолжува и воедно се договори следна средба на 17.мај со цел изнаоѓање на решенија во рамки на позитивните законски прописи.
Страните разговараа и за формирање на работна група за нов Колективен договор за предучилишните установи, чија важност истекува со месец јуни. Новиот Колективен договор треба да понуди нови решенија кои ќе значат унапредување на предучилишното згрижување и воспитување“, се наведува во соопштението за средбата.