Луиза Џонс, поранешна британска воена разузнавачка и шефица на разузнавачкиот оддел во компанијата McKenzie Intelligence Services, ја коментираше денешната најава на Финска за влез во НАТО.
Финска, која со децении води политика на неутралност, денеска објави дека сака што поскоро да влезе во НАТО, по што следеше бурна реакција од Русија.
„За да разбереме колку е значаен овој потег, треба да ја погледнеме историјата на НАТО. Алијансата беше формирана по Втората светска војна и нејзиниот примарен фокус беше на Германија, Франција, Британија и, се разбира, САД“, рече Џонс и додаде:„Главната цел беше да се спротивставиме на Советскиот Сојуз“.
Но, по падот на Советскиот Сојуз во раните 1990-ти, балтичките земји Естонија, Литванија и Латвија практично веднаш аплицираа за членство во НАТО, посочи таа.
„Земјите како Финска и Шведска, кои водеа политика на неутралност за време на Студената војна, решија да продолжат со таквата политика“, рече Џонс, нагласувајќи дека денот кога Шведска и Финска ќе влезат во НАТО ќе биде лош ден за претседателот Путин.
„Тоа навистина не е нешто што тој го посакува. Неутралноста на Шведска и Финска му одговараше бидејќи можеше да се фокусира на југот“, рече Џонс, додавајќи: „Но, сега има многу малку што може да направи. Тој брод отплови“.