Ковачевски да внимава што потпишува, интеграцијата во ЕУ не смее да биде процес на побугарчување, се истакнува во соопштението од опозицискиот ВМРО-ДПМНЕ.
„Бугарските барања и изјавите на Петков за поместување на ветото со услови кои како што вели не треба да се бараат наеднаш, се опасност дека Ковачевски е на пат да потпише или прифати рамка за асимилација на Македонците. Ковачевски и Османи целосно нетранспарентно го водат процесот на преговори, и ги носат граѓаните и општеството пред свршен чин. Ковачевски уште не се изјаснил ниту за клубот Ванчо Михајлов и фашистичките тенденции, тој немаше ниту да реагира на негацијата на Македонците да не беше преголемиот јавен и медиумски револт“, се потенцира во писмената реакција од ВМРО-ДПМНЕ.
Ковачевски, како што додаваат од оваа партија, со преговорите се однесува како да не е од овде, па чека првин дали одредена работа ќе наиде на критика на јавноста, за потоа тој да ја осуди или пофали.
Според нивните оценки, Ковачевски се однесува целосно незрело, и тој заради неговиот аматеризам и неспособност е на пат да ја понижи државата.
„Токму затоа Ковачевски веднаш да побара писмени гаранции од ЕУ за македонскиот идентитет, јазик и историја“, е истакнато во писмената реакција од ВМРО-ДПМНЕ.
