Германскиот канцелар Олаф Шолц изрази сомневање дека претседателските советници целосно го информираат претседателот Владимир Путин за ситуацијата во Украина.
На германски политички подкаст што ќе биде објавен в недела, Шолц вели дека е убеден оти рускиот претседател не е добро информиран и дека неговите служби кријат многу од него.
„На пример, колку руски војници загинале во оваа војна“, посочува германскиот канцелар.
Слична изјава даде и шефот на британската разузнавачка агенција GCHQ, кој во четвртокот рече дека советниците на Путин се плашат да му ја кажат вистината. Коментари во оваа насока даде и американската влада во четвртокот, повикувајќи се на своите разузнавачки информации.
Сепак, рече Шолц, Кремљ треба да биде свесен за размерите на неговата погрешна проценка за Украина. Путин почувствува дека е измамен од руската војска, рече Шолц, што, како што вели, предизвикало тензии меѓу лидерот на Кремљ и военото раководство.
Шолц смета дека Русија не може да излезе како победник од оваа ситуација, без разлика како ќе заврши конфликтот.
„Оваа војна ја уништува не само Украина, туку и иднината на Русија“, рече тој, додавајќи дека без мирно решение, Русија нема да може да се врати ниту на умерен економски раст.
