Хрватската влада денеска одржа седница на која на почетокот се обрати и премиерот, Андреј Пленковиќ.
„Мило ми е што во Хрватска има единство во осудата на оваа агресија и што Хрватска е на вистинската страна од правото, моралот и историјата. Има огромна хуманитарна криза. Расте бројот на невини жртви, бројот на убиени цивили, уништувањето на украинските градови. Повеќе од милион луѓе ја напуштија, а се проценува дека околу пет милиони луѓе би можеле да ја напуштат Украина“, рече Пленковиќ.
„Ова е една од директните последици на катастрофалната руска агресија врз Украина“, додаде тој.
Тој ги опиша извештаите од Мариупол како особено загрижувачки.
„Она што сакам уште еднаш да го кажам е дека Хрватска вчера политички го изрази својот став. Ја поддржавме резолуцијата на ОН која се однесуваше на Украина и секако тој став беше забележан и во меѓународната заедница“, рече Пленковиќ.
