Рускиот претседател Владимир Путин потпиша указ за дополнителни привремени економски мерки за обезбедување на финансиската стабилност на Русија, соопшти Кремљ.
„ Од 2 март 2022 година, се забранува извоз на готовина во странска валута и (или) монетарни инструменти во странска валута во износ од повеќе од 10.000 американски долари пресметани по официјалниот курс на Централната банка на Русија, утврден на денот на повлекување“, се вели во соопштението.
Путин, исто така, нареди од 2 март да се одобри посебна процедура за трансакции за жителите во врска со одобрувањето заеми во рубли, како и во врска со продажбата на хартии од вредност и недвижен имот на странски лица поврзани со земји кои воведоа санкции против Русија.
За спроведување на ваквите операции ќе биде потребна дозвола од владината комисија за странски инвестиции, а операциите со недвижен имот и хартии од вредност ќе може да се вршат и на организирано тргување врз основа на дозвола од Централната банка во договор со Министерството за финансии.
Како што беше прецизирано, овие мерки се предизвикани од „непријателските дејствија на САД, кои се во спротивност со меѓународното право, и постапки на странски држави и меѓународни организации кои им се приклучија“. Тие се насочени кон заштита на националните интереси.
