Поранешната германска канцеларка Ангела Меркел остро го осуди рускиот напад врз Украина и оцени дека станува збор за очигледно кршење на меѓународното право и војна за агресија.
„Оваа агресивна војна на Русија претставува длабока пресвртница во историјата на Европа по крајот на Студената војна. Нема оправдување за ова очигледно кршење на меѓународното право и најостро го осудувам“, изјавила Меркел, пренесува Дојче веле.
Таа кажала дека сочувствува со украинскиот народ и неговото раководство.
„Моите мисли и солидарност се во овие страшни моменти со украинскиот народ и владата на претседателот Володимир Зеленски“, нагласи поранешната канцеларка.
Меркел, која беше канцеларка кога Русија го анектираше Крим во 2014 година, а потоа повика на продолжување на дијалогот со Москва, истакна дека ситуацијата сега е поинаква поради руската инвазија на Украина во целост.
