Иако повеќето луѓе би сакале да се евакуираат на безбедно во услови на воена состојба, поранешниот сингапурски ТВ актер Икс Шен е категоричен да остане во Киев, Украина, која сега е цел на напад на руските сили.
Во Зум-интервју за „Стреитс тајмс“, 50-годишникот рече дека доцна вечерта во средата слушнал експлозија што доаѓала од далечина од околу 20 до 40 километри. Веднаш потоа слушнал повеќе експлозии, а исто така и сирени за воздушен напад. Од балконот во својот дом, тој гледал десетици луѓе на улиците со куфери во рацете.
Сепак, Икс и неговата сопруга, украинска лекарка по традиционална кинеска медицина, нема да се евакуираат. Немаат деца, а сопругата има семејство што живее во јужниот пристанишен град Одеса.
Тој нагласува дека заминувањето носи поголем ризик од останувањето дома.
„Сè додека струјата и интернетот се достапни, мислам дека нема потреба да се евакуирам бидејќи евакуацијата ќе предизвика цела низа проблеми“, рече тој.
„Мораме да планираме кој пат за излез е всушност подобар. И не сакаме да останеме заглавени на автопат без гориво, без храна, а времето е ладно, тогаш ќе се појават многу проблеми. Сметам дека така ќе преземеме поголем ризик отколку да останеме во Киев.“
Икс , кој сè уште е ангажиран во филмската индустрија, и неговата сопруга се венчале пред седум години, а пред четири месеци се преселиле во квартот Подил во Киев.
