Заменик претседателот на Владата задолжен за европски прашања, Бојан Маричиќ се сретна со амбасадорот на Република Албанија во земјава, Н.Е. Фатос Река.
Вицепремиерот Маричиќ и Река разговараа за можното заедничко отпочнување на пристапните преговори со Унијата, со што двете соседски земји ќе имаат можност да остварат и потесна соработка за размена на искуства и заемна поддршка во целокупниот процес на преговори со ЕУ. Амбасадорот Река ја потврди поддршката од страна на Албанија за надминување на отворените прашања со соседна Бугарија со цел забрзување а процесот.
На средбата беше истакнато значењето на тековните иницијативи во кои заедно учествуваат Северна Македонија и Албанија, односно Отворен Балкан и паралелно и Берлинскиот процес. Вицепремиерот Маричиќ и амбасадорот Река посочија дека интензивирањето на билатералната соработка и на политичко и на економско ниво е од клучно значење во претстојниот период. Воедно ги поздравија иницијативите за реализација на заеднички инфраструктурни проекти чие спроведување ќе придонесе во приближувањето на земјите, односно скратување на времето на патување и олеснување на трговската размена, како во рамки на проектите за прекугранична соработка со европска поддршка, така и со заеднички проекти помеѓу двете влади.
