Новите сигнали дека преговорите меѓу американските и иранските власти за заживување на договорот за ограничување на развојот на нуклеарно оружје во Иран привршуваат, би можеле да ја запрат цената на нафтата, која во петокот достигна највисоки неколку години, велат трговците.
Доколку САД ги укинат санкциите кон Иран, тоа ќе придонесе за зголемени залихи и поголема понуда на нафта на глобалниот пазар.
Соединетите држави во петокот ја обновија својата одлука за ублажување на санкциите дозволувајќи меѓународната нуклеарна соработка со Иран да продолжи на проекти дизајнирани да ја спречат употребата на иранското оружје за развој на нуклеарно оружје.
Висок функционер на Стејт департментот во петокот рече дека ублажувањето на санкциите треба да овозможи технички разговори за заживување на нуклеарниот договор, но тоа не значи дека САД се на работ да постигнат договор за негово обновување.
Говорејќи под услов да остане анонимен, европски функционер рече дека главните претставници на двете страни во разговорите – кои се индиректни бидејќи Иран досега одбиваше да седне со американските дипломати – најверојатно ќе се сретнат во вторник во Виена.
Од друга страна, иранскиот министер за надворешни работи во саботата оцени дека потегот на САД за ублажување на санкциите кон Техеран не е доволен и дека Вашингтон треба да даде гаранции за заживување на нуклеарниот договор од 2015 година склучен со големите западни сили.
Израелскиот премиер Нафтали Бенет вчера изјави дека разговарал со Бајден за модалитетите за запирање на иранската нуклеарна програма.
