По повод одбележувањето 150 години од раѓањето на Гоце Делчев, Владата, утре (4 февруари), со свои претставници ќе организира и ќе биде вклучена во неколку свечени настани и одбележувања.
Во рамките на овие одбележувања, утре во 13 часот, на гробот на Гоце Делчев во црквата Свети Спас делегација на Владата составена од министерката за култура, Бисера Костадиновска Стојчевска и заменичката министерка за надворешни работи, Фатмире Исаки, ќе положи венец заедно со делегации од Република Бугарија.
„Владата го поздравува учеството на делегациите на Бугарија во одбележувањето на 150-годишниот јубилеј од раѓањето на, за нас, најзначајниот историски лик за нашата земја, со што двете држави продолжуваат со напорите за интензивирање и продлабочување на вкупната соработка и зацврстување на довербата“, се наведува во владиното соопштение.
Инаку, обележувањето на јубилејот ќе започне во 10 часот, кога Владата ќе има своја делегација составена од првиот вицепремиер и министер за политички систем, Артан Груби, министерот за транспорт и врски, Благој Бочварски и заменик-министерот за информатичко општество и администрација Александар Бајдевски на положувањето цвеќе на гробот на Гоце Делчев во црквата Свети Спас, активност на која се вклучени повеќе државни институции.
Подоцна, во 10:30 часот, владина делегација составена од министерката за култура Бисера Костадиновска Стојчевска, заменик-министерот за земјоделство, шумарство и водостопанство, Трајан Димковски и советникот на премиерот Едмонд Адеми ќе положи цвеќе на споменикот на Гоце Делчев во градскиот парк во Скопје, а во 11 часот на споменикот на Гоце Делчев на Плоштадот Македонија во Скопје.
Во 12 часот, во Музејот на македонската борба, министерот за внатрешни работи Оливер Спасовски ќе присуствува на свеченото отворање на изложбата по повод 150 години од раѓањето на Гоце Делчев, организирана од Државниот архив на Северна Македонија и под покровителство на претседателот на државата, Стево Пендаровски.
