Затвореник кој работел во фабрика за свеќи во Кентаки за време на торнадото што погоди делови од САД, ги искористил околностите на овој катастрофален настан и побегнал, пишуваат медиумите.
Франциско Старкс (44) отслужувал дел од казната во фабрика за свеќи кога зградата била погодена и урната од торнадото. Затвореникот ја преживеал несреќата и бил пренесен на лекување во блиската болница. Но кога излегол од болница побегнал и сега полицијата го бара.
Старкс е осуден на затвор за кражба, кражба на автомобил и поседување украден имот, пишуваат американските гласила.
Смртоносните торнада што опустошија шест американски сојузни држави од петокот до саботата го опустошија и градот Мејфилд. Смртта на 64 лица во Кентаки по разорното торнадо денеска е официјално потврдена, а властите предупредуваат дека бројот на жртвите најверојатно ќе биде уште поголем.
