Директорот на Агенција за храна и ветеринарство (АХВ), Николче Бабовски, оствари работен состанок со Џерек Бас, нов политичко-економски советник во американската амбасада во земјава.
Како што информираат од АХВ, на состанокот биле презентирани приоритетите и активностите на Агенцијата, а разгледани биле и полињата за унапредување и насочување на идната меѓународна соработка.
„Во насока на унапредување на институционалната соработка како основа за унапредување на економската соработка меѓу двете земји, г- дин Бас ја потенцира можноста за вклучување на АХВ во тековните и новите проекти кои се реализираат од страна на Амбасадата на САД во нашата земја, преку помош во организирање на обуки, работилници, семинари и слично. Како што рече тој, акцент во соработката ќе се стави на темите кои се од делокругот на работење на АХВ, но и на новите технологии, кои се директно поврзани со светскиот предизвик за справување со климатските промени“, се наведува во соопштението за средбата.
Бабовски изразил благодарност за понудената можност и потенцирал дека АХВ располага со стручен и компетентен кадар кој со учество во проектите, покрај тоа што ќе има можност да ги унапреди своите знаења од областа на безбедноста на храната, здравствената заштита и благосостојбата на животните, ќе може адекватно да даде придонес и во реализацијата на проектите.
