Гeрманија, Чешка и Унгарија денеска забележаа најголем број новозаразени со коронавирус во еден ден од почетокот на пандемијата, соопштија тамошните власти.
Според Институтот „Роберт Кох“, во Германија во последните 24 часа се регистрирани 66.884 случаи на инфекција со Ковид-19.
Седумдневната инциденца е 404,5 случаи на 100.000 жители и за прв пат е поголема од 400.
Една недела претходно биле пријавени 52.826 случаи, а седумдневната инциденца била 319,5 случаи на 100.000 жители.
Денеска се пријавени и 335 смртни случаи поврзани со Ковид-19, за разлика од 294 пред седум дена.
Од почетокот на пандемијата, Германија има регистрирано 5.497.795 случаи на инфекција со Ковид-19, но реалниот број на случаи е веројатно многу поголем. Потврдени се 99.768 смртни случаи.
Чешка денеска пријави 25.864 нови случаи на инфекција со Ковид-19, што е најголем број во земјата со 10,7 милиони жители од почетокот на пандемијата, според Министерството за здравство.
Унгарија, исто така, има рекорден број на нови случаи со 12.637 потврдени инфекции во последните 24 часа, објави тамошното Министерство за здравство.
