Државниот јавен обвинител Љубомир Јовески заедно со шефицата на на Одделот за организиран криминал Вилма Русковска се во Бугарија, на местото на несреќата каде во автобуска несреќа настрадаа 45 луѓе, македонски државјани, а седуммина се повредени. Тие на автопатот „Струма“ се сретнаа со директорот на бугарската Национална истражна служба Борислав Сарафов.
Русковска изјави дека на лице место е и превозникот на автобусите, претставникот од „Беса-Транс“ и таа имала кратка средба со него.
„Тука е превозникот, кратко се сретнавме. Ми рече дека 20 години има транспортна фирма, досега немале инцидент, но ние ќе ја обезбедиме целата документација за сите автобуси, кога се регистрирани, кога бил извршен технички преглед и ќе ги испратиме до колегите. Сепак, знаете, тој сега што сака може да каже, но ние обвинителите повеќе веруваме во документи отколку во било што друго“, рече Русковска.
Јовески изрази сочувство до семејствата на настраданите и рече дека верува оти бугарските истражни органи професионално ќе ги разјаснат сите околности во овој настан.
„Ние ќе дадеме помош во делот на обезбедување документација, идентификување на настраданите и се она што е потребно во истражувањето“, изјави Јовески.
