Англиските шампиони Манчестер сити ќе бидат одредено време без еден од своите најдобри играчи, откако Кевин де Брујне вратил позитивен тест на КОВИД-19.
30-годишниот Де Брујне играше за Белгија во квалификациите за Мундијалот, каде што „ѓаволите“ лесно се квалификуваа, но сега мора да паузира барем три натпревари поради изолацијата која мора да ја помине. Пеп Гвардиола има дополнителни главоболки бидејќи не е сигурен за подготвеноста на Џек Грилиш и Фил Фоден за саботниот меч со Евертон.
„Џек беше подобар, но Фил се врати со добра модринка на неговата нога по настапите за репрезентацијата. За жал, Кевин беше позитивен на КОВИД во Белгија, така што ќе мора да биде во изолација 10 дена. Тој е во Англија, и сега е најважно да оздрави, повеќе од било кој натпревар. И со еден позитивен е опасно, бидејќи луѓето уште умираат. Тој е вакциниран и се надевам дека ќе помине со помали симптоми“, изјави Гвардиола.
Де Брујне сигурно не игра против Евертон и во мега-дуелот од ЛШ со Пари Сен-Жермен, а исто така ќе отсуствува на мечот против Вест хем на 28 ноември.
> Де Брујне позитивен на КОВИД, пропушта три натпревари <
