Градоначалникот во заминување, Петре Шилегов го крши изборниот закон. На три дена од својот изборен пораз, незаконски распишува тендер, реагираат од ВМРО-ДПМНЕ, по прес – конференцијата на Шилегов на која објави дека е распишан тендер за реализација на Бас рапид транзит системот.
„Изгледа гори под нозе па затоа му се брза да распишува тендери и уште повеќе се закопува. Мисли дека ако со ваков гол популизам ќе се спаси од катастрофален пораз и ќе се претстави дека нешто сработил, тогаш се лаже. Проектот кој што денес спротивно на закон го тендерира, на само два три дена од изборниот пораз кој ќе го доживее, е критизиран од јавноста. Народот виде каков неработник е, а веќе се гледа и дека отишол од другата страна на законот“, велат од ВМРО-ДПМНЕ.
Од партијата го обвинија Шилегов дека со прст не мрднал четири години за Скопје и затоа, како што велат од ВМРО-ДПМНЕ, на 31-ви ќе му биде испорачана сметката од граѓаните во форма на изборна казна, а за други казни ќе одлучува ослободеното правосудство многу скоро.
