Јавниот увид на Избирачкиот список за локалните избори започнува од денеска и ќе трае до 9 септември. ДИК од денеска на увид ќе ја стави новата состојба на податоци во Избирачкиот список што ќе се користи на денот на изборите.
До 9 септември граѓаните барањето за запишување, бришење или дополнување во Избирачкиот список треба да го достават писмено до подрачните единици или канцеларии на ДИК или електронски да се обратат до Комисијата и притоа да достават соодветни докази.
Рокот за заклучување на Избирачкиот список со сите промени, како од граѓаните така и од политичките партии е 24 септември, додека Избирачкиот список финално треба да биде потпишан до 1 октомври.
Граѓаните своите податоци во Избирачкиот список можат да ги проверат преку веб-страницата на Државната изборна комисија – www.sec.mk или на https://izbirackispisok.gov.mk/.
ДИК ги интензивира подготовките за изборите, а на последната седница се донесени неколку нови упатства за изборите и програми за едукација. На 25 август се очекува да пристигнат првите 250 апарати за вчитување на отисоци од прсти и системот што ќе се употребуваат првпат на овие локални избори во Северна Македонија.
Иборната кампања за првиот круг започнува на 27 септември на полноќ и завршува на 15 октомври на полноќ.
Изборите, што повторно ќе се одржат со протоколи за заштита од ширење на Ковид-19, се закажани за 17 октомври. Вториот круг од изборите треба да биде на 30 октомври.
