Германија ја прогласи Шпанија за ризично подрачје, соопшти Министерството за надворешни работи, откако стапката на инфекција со Ковид-19 за една недела се зголеми повеќе од двојно, додека делта-сојот се шири меѓу невакцинираните млади луѓе.
Според одлуката, која ги вклучува популарните туристички дестинации на Балеарските Острови и Канарските Острови и стапува на сила в недела, патниците ќе треба да покажат негативен тест за коронавирус по враќањето во Германија за да избегнат карантин.
Сепак, натамошното зголемување на стапката на инфекција во Шпанија може да доведе до задолжителен карантин за невакцинирани патници, создавајќи несигурност во патувањето пред шпицот на сезоната на училишни празници, за време на која Германците ги преплавуваат сончевите морски дестинации.
Високо зависна од туризмот, Шпанија се обидува да воспостави деликатна рамнотежа помеѓу отворањето на земјата доволно за да ги привлече туристите назад, додека го држи под контрола бројот на заразени за да избегне одвраќање на потенцијалните посетители.
