СДСМ цели 3 години ги лажеа и подгреваа луѓето од Центар, од Ново Маало и останатите дека нема да се гради на паркингот кај „Холидеј Ин“, за да изминативе денови, без грам срам пред граѓаните, излезат и издадат градежни дозволи, порача портпаролот на ВМРО-ДПМНЕ, Димче Арсовски.
„Ниту се случи ревизија, ниту укинување на дозволи, ниту ништо. Лага до лага цели три години. Три години држеа лажен мораториум и си ја префрлаа вината едни на други, Шилегов кај Богдановиќ, Богдановиќ кај Бочварски, Бочварски кај куририте што не го донеле писмото, и тоа само за да купат политички поени кај граѓаните, за да сега пред избори се најдат во тесно и издадат градежни дозволи“, обвини Арсовски.
Според партискиот портпарол, Богдановиќ и Шилегов веќе немаат кредибилитет да бараат било каква доверба кај граѓаните.
„Излажаа на најдрзок начин дека нема да се гради кај Холидеј Ин и за на крај, сепак овде да никнат планираните според ДУП објекти“, кажа тој.
Според Арсовски, градоначалниците од СДСМ на следните избори ги чека казна, за како што рече, нивните лаги и неисполнети ветувања.
