Елен Деџенерис ќе стави крај на своето долгогодишно ток-шоу во 2022 година, по 19 години во етерот.
„Колку и да е одлична оваа емисија, и колку и да е забавна, едноставно повеќе не е предизвик“, изјави таа за „Холивуд репортер“.
Најавата доаѓа само неколку месеци откако шоуто се соочи со обвинувања за токсична работна атмосфера. Ваквите наводи доведоа до откази на тројца главни продуценти, а Деџенерис ја отвори новата сезона со јавно извинување.
Шоуто на Елен Деџенерис, кое се емитува од септември 2003 година, ќе заврши во 2022 година по 19-тата сезона.
Секојдневна комбинација од комедија, интервјуа и интересни приказни на луѓе е главна тема на телевизиското шоу, иако гледаноста опаѓа во последниве години.
