Британскиот премиер Борис Џонсон изјави денес дека извештајот за расна нееднаквост направен по налог на владата и со заклучок дека нема институционален расизам во Велика Британија е охрабрувачки, но треба да се стори повеќе за да се реши овој проблем.
„Не сакам да кажам дека владата ќе се согласи со апсолутно сè што е во него, но содржи неколку оригинални и стимулативни заклучоци и мислам дека луѓето треба да го прочитаат и да размислат“, рече Џонсон за извештајот објавен вчера од британската Комисија за расни и етнички нееднаквости, пренесува „Ројтерс“.
Џонсон посочи дека има многу сериозни прашања со кои треба да се соочи британското општество, како што е расизмот.
„Треба да сториме повеќе за да го решиме тоа и треба да ја разбереме сериозноста на проблемот“, рече Џонсон.
Извештајот на британската Комисија за расни и етнички нееднаквости беше нарачан од владата на премиерот Џонсон по големите протести на движењето „Црните животи се важни“ минатото лето поради смртта на Афроамериканецот Џорџ Флојд во полициски притвор во САД.
„Ројтерс“ потсетува дека специјалниот советник на британскиот премиер за граѓанско општество и заедници, Семјуел Касуму, поднесе оставка денес, еден ден по објавувањето на извештајот за расните несогласувања во Велика Британија, во кој беше заклучено дека земјата нема системски проблем со расизмот.
Касуму, кој инаку е црнец, ќе ја напушти таа позиција следниот месец, а канцеларијата на Џонсон објави дека тој планирал да го стори тоа пред неколку месеци, пренесува АП.
