Претседателката на Европската комисија, Урсула фон дер Лајен изјави дека ЕУ е со Хрватска, по новиот разорен земјотрес и побара од комесарот за кризи Јанез Ленарчиќ што побрзо да отпатува во Хрватска.
Силен земјотрес со јачина од 6,2 степени околу пладне го погоди централниот дел на Хрватска, предизвикувајќи големи штети во Петриња, Сисак, Загреб и други места. Потресот бил толку силен што се почувствувал и во соседните земји.
„Уште еден разорен земјотрес во Хрватска, втор во изминатите два дена. Повторно разговарав со премиерот Андреј Пленковиќ. Подготвени сме да помогнеме. Го замолив Јанез Ленарчиќ да отпатува во Хрватска веднаш штом ситуацијата дозволи. Ние стоиме покрај Хрватска“, напиша Фон дер Лајен на „Твитер“.
Денешниот земјотрес се случи 24 часа по малку послабиот земјотрес со епицентар кај Петриња, на околу 50 километри од Загреб.
