Германската канцеларка, Ангела Меркел, предупреди дека претстои тешка зима, две недели откако беше воведен делумен карантин во земјата, во траење од еден месец, за да се намали бројот на заразени со коронавирус.
„Претстојната зима ќе биде предизвик за сите“, рече Меркел.
Во Германија, делумното затворање на земјата се спроведува веќе две недели во борбата против ширењето на коронавирусот.
„Вирусот ќе продолжи да доминира во нашите животи уште некое време“, рече Меркел, додавајќи дека ова значи дека луѓето нема да можат да се гледаат како порано.
Нејзините коментари уследија пред закажаниот состанок во понеделник на кој федералните претставници ќе ја проценат ефективноста на делумното затворање на Германија.
Баварскиот премиер, Маркус Содер, рече дека нема да има олабавување на мерките барем до крајот на месецот и не ја исклучи можноста за построги мерки во декември.
Во меѓувреме, во саботата беа одржани неколку протестни собири против мерките низ целата земја.
Германија вчера потврди 22.461 нови случаи на коронавирус, а 178 лица починаа, објави државниот центар за контрола на болести.
